Նախագահ Սերժ Սարգսյանի աշխատանքային այցը Սյունիքի եւ Վայոց ձորի մարզեր

Աշխատանքային այցով Սյունիքի մարզում գտնվող Նախագահ Սերժ Սարգսյանը հոկտեմբերի 15-ին Կապանում մասնակցել է Սյունիքի մարզի երիտասարդ ընտանիքների համար նախատեսված շենքի հիմնարկեքի արարողությանը:

Մարզի երիտասարդ ընտանիքների համար Կապան քաղաքում բազմաֆունկցիոնալ շենքային համալիրը կառուցվում է "Աջակցություն երիտասարդ ընտանիքների բնակարանաշինությանը" բնակարանային ապահովության սոցիալական ծրագրի շրջանակներում` ՀՀ Նախագահ, ԵՊՀ շրջանավարտների միավորման հոգաբարձուների խորհրդի նախագահ Սերժ Սարգսյանի բարձր հովանու ներքո:

Շենքային համալիրի բնակարանները շուկայականից անհամեմատ էժան գներով կտրամադրվեն Սյունիքի մարզի երիտասարդ ընտանիքներին: Բնակելի համալիրը բաղկացած կլինի երեք մասնաշենքից եւ կունենա 335 բնակարան:

Կապանում Հանրապետության ղեկավարը ծանոթացել է նաեւ քաղաքի հրապարակում գտնվող վերանորոգված փոստի շենքի պայմաններին, բնակչությանը մատուցվող ծառայություններին եւ ներկա գտնվել` "Կոնվերսբանկ” ՓԲԸ-ի “Փոստբանկ Կապան 01" եւ Հայփոստի "Կապան" մասնաճյուղերի բացմանը:

Նախագահ Սարգսյանին ներկայացվել է նորոգված եւ ժամանակակից սարքավորումներով հագեցած մասնաճյուղն ու փոստային բաժանմունքը: Մասնաճյուղերից "ՓոստԲանկ Կապան 01"-ը ֆիզիկական անձանց մատուցելու է փոստբանկային ծառայություններ, իսկ “Կապան” մասնաճյուղը իրավաբանական և ֆիզիկական անձանց կմատուցի “Կոնվերս բանկի” կողմից մատուցվող բանկային ողջ փաթեթը: Միաժամանակ, կգործարկվի նաև բանկի տարածաշրջանային օժանդակող գրասենյակը, որը կապահովի մարզում առկա և բացվելիք բանկի մասնաճյուղերի գործունեությունը:

Հանրապետության ղեկավարն այնուհետ այցելել է Սյունիքի մարզպետարան, որտեղ Նախագահի մասնակցությամբ տեղի է ունեցել աշխատանքային խորհրդակցություն: Մարզպետ Սուրեն Խաչատրյանը ներկայացրել է ընթացիկ տարվա հոկտեմբերի 1-ի դրությամբ մարզի սոցիալ-տնտեսական վիճակը, ըստ բնագավառների իրականացված աշխատանքն ու առաջիկա ծրագրերը:

Սյունիքի մարզում աշխատանքային այցի առաջին օրն ավարտելուց հետո, Նախագահ Սարգսյանը մեկնել է Վայոց Ձորի մարզ, որտեղ Երկրի ղեկավարին ներկայացվել է Ջերմուկ քաղաքի զարգացման ծրագրի իրականացման ընթացքը:

Նախագահ Սերժ Սարգսյանը Սյունիքի մարզ աշխատանքային այցի երկրորդ օրը` հոկտեմբերի 16-ին, այցելել է Գորիսի նորակառույց սրտաբանական հիվանդանոց: Առողջապահական այս հաստատությունը նպատակ ունի արագ բուժօգնություն ցուցաբերել Հայաստանի հարավային տարածաշրջանի, ինչպես նաեւ ԼՂՀ-ի բնակչությանը:

Գորիսում Հանրապետության ղեկավարը ներկա է գտնվել նաեւ քաղաքի օրվա կապակցությամբ կազմակերպված ժողովրդական տոնակատարությանը: Տոնական միջոցառումների շրջանակում, Գորիսում բացվել է Գրիգոր Տաթեւացու արձանը:

Հոկտեմբերի 16-ին Նախագահ Սերժ Սարգսյանը հանդիպել է նաեւ հարյուրից ավելի սփյուռքահայ լրագրողների եւ խմբագիրների հետ, ովքեր Երկրի ղեկավարի հետ հանդիպման նպատակով Գորիս են ժամանել ԼՂՀ մայրաքաղաք Ստեփանակերտից, որտեղ մասնակցել են Լրագրողների համահայկական 5-րդ համաժողովին:

Գորիսից Նախագահը մեկնել է Հալիձոր: Այս բնակավայրից մեկնարկել է “Տաթեւի վերածնունդ” ծրագիրը: Ծրագրի շրջանակներում տեղի է ունեցել Հալիձոր եւ Տաթեւ գյուղերը միացնող աշխարհի ամենաերկար ճոպանուղու տեխնիկական գործարկման արարողությունը: Որոտանի գեղատեսիլ կիրճի վրայով ձգվող 5.7 կմ երկարությամբ ճոպանուղին նոր հնարավորություններ է բացում վանական համալիրը այցելուների համար հեշտ հասանելի դարձնելու տեսանկյունից:

Ծրագիրը նպատակաուղղված է Տաթեւի մերձակա շրջանների զարգացմանը, Հայաստանի այդ հնագույն եւ հեղինակավոր վանական համալիրի հոգեւոր, գիտական եւ մշակութային ավանդույթների երբեմնի համբավի ու փառքի վերականգնմանը:

Ճոպանուղու գործարկման արարողությանը Հանրապետության ղեկավարի հետ ներկա են եղել Ն.Ս.Օ.Տ.Տ. Գարեգին Բ Ամենայն Հայոց Կաթողիկոսը, ԼՂՀ Նախագահը, հասարակական, քաղաքական, մշակութային շրջանակների ներկայացուցիչներ, պաշտոնյաներ, հարյուրավոր հյուրեր աշխարհի տարբեր երկրներից, որոնցից շատերը ծրագրի բարերաներն են: Ճոպանուղու բացման կապակցությամբ` Նախագահ Սերժ Սարգսյանը Տաթեւում ողջույնի խոսք է հղել: