01
06, 2010

Նախագահ Սերժ Սարգսյանի աշխատանքային այցը Դոնի Ռոստով

album picture
album picture
album picture
album picture
album picture
album picture
album picture
album picture
album picture
album picture
album picture
album picture
album picture
Հունիսի 1-ին Դոնի Ռոստովում տեղի է ունեցել Հայաստանի Հանրապետության Նախագահ Սերժ Սարգսյանի եւ Ռուսաստանի Դաշնության Նախագահ Դմիտրի Մեդվեդեւի հանդիպումը:

Հայաստանի եւ Ռուսաստանի ղեկավարները քննարկել են հայ-ռուսական ռազմավարական գործընկերությանը, տնտեսական համագործակցությանը, հումանիտար ոլորտում շփումների ակտիվացմանը վերաբերող հարցերի լայն շրջանակ, մտքեր փոխանակել միջազգային եւ տարածաշրջանային խնդիրների վերաբերյալ:

Ողջունելով Հայաստանի իր գործընկերոջը` ՌԴ Նախագահն ասել է. “Մենք որպես մոտ գործընկերներ, ռազմավարական դաշնակիցներ պետք է հաճախակի հանդիպենք: Ըստ էության, մենք հենց այդպես էլ վարվում ենք: Վերջերս Դուք մասնակցեցիք մայիսի 9-ի` ֆաշիստական զավթիչների դեմ այն ժամանակ մեր ընդհանուր պետության Հաղթանակի 65 –ամյակի տոնակատարություններին: Ես ցանկանում եմ մեկ անգամ եւս շնորհակալություն հայտնել, որ Դուք այդ օրը մեզ հետ էիք: Դա ցույց է տալիս մեր պետությունների մերձավորության աստիճանը եւ ռազմավարական հարաբերությունները զարգացնելու հետագա ցանկությունը”:

ՌԴ Նախագահ Դմիտրի Մեդվեդեւը ՀՀ Նախագահ Սերժ Սարգսյանին տեղեկացրել է եվրոպական գործընկերների հետ իր մի քանի հանդիպումների արդյունքների մասին հայ-թուրքական հարաբերությունների կարգավորման գործընթացի համատեքստում:

Հայաստանի Նախագահը կարեւորել է նման աշխատանքային հանդիպումները եւ ասել. “Կարծում եմ, որ սա լավ ձեւաչափ է: Եւս մեկ անգամ շնորհակալություն հրավերի եւ այս գեղեցիկ քաղաք այցելելու հնարավորության համար:

Դոնի Ռոստովի եւ մարզի հետ հայ գիտական եւ ստեղծագործական մտավորականության մի ամբողջ շարք անուններ են կապված: Այստեղ կա մեծ սփյուռք: Այսօր նախատեսված է իմ հանդիպումը Ռուսաստանի հարավային մասի սփյուռքի ներկայացուցիչների հետ”:

ՀՀ Նախագահ Սերժ Սարգսյանը շնորհակալություն է հայտնել ջերմ ընդունելության եւ Մեծ հաղթանակի 65-ամյակի միջոցառումների փայլուն կազմակերպման համար եւ ասել. “Ես հպարտ էի. հզոր շքերթը մեր ընդհանուր պատմության եւ մեր մարտական եղբայրության հրաշալի հիշեցում էր”:

Հանդիպման ընթացքում կողմերը պայմանավորվածություն են ձեռք բերել ՌԴ Նախագահ Դմիտրի Մեդվեդեւի` այս տարվա օգոստոսին Հայաստան կատարելիք այցի վերաբերյալ:

Աշխատանքային այցով Դոնի Ռոստովում գտնվող Նախագահ Սարգսյանն այցելել է տեղի հայ առաքելական Սուրբ Համբարձում եկեղեցի, պատմա-ազգագրական թանգարան, ինչպես նաեւ հարգանքի տուրք է մատուցել Մեծ հայրենականին մասնակցած Մյասնիկյանի շրջանի հայ զինվորների հիշատակին:

Նախագահ Սարգսյանը հանդիպումներ է ունեցել նաեւ Ռոստովի մարզի ղեկավարության եւ ՌԴ Հարավային Դաշնային շրջանի հայ համայնքների ներկայացուցիչների հետ:

Հայ համայնքի հետ հանդիպմանը Հայաստանի Նախագահն ասել է. "Դոնի Ռոստովն այնքան շատ բան է տվել մեր գրականությանը, մշակույթին եւ քաղաքական մտքի զարգացմանը, որ այստեղ Հայաստանի Նախագահի խոսքը կարող է հնչել առանձնահատուկ շեշտադրումով: Նկատի ունեմ, որ իմ թիկունքին են մեծանուն նորնախիջեւանցիները` Ռափայել Պատկանյանը, Միքայել Նալբանդյանը, Մարտիրոս Սարյանը եւ շատերը, որոնց անուններն ու գործը նվիրական են բոլորիս համար: Սա պարտավորեցնող է հատկապես նրանց համար, ովքեր այսօր ճակատագրի բերումով ապրում եւ աշխատում են այստեղ, եւ կոչված են արժանավայել կերպով շարունակելու հայկականության մեծ ու հարուստ այդ ավանդույթները: Այսօր Հայաստանի եւ Ռուսաստանի հարաբերություններն ամուր հիմքերի վրա են եւ, համոզված եմ, այդպես էլ շարունակվելու է: Այս իրողությունը մեր համայնքների զարգացման համար ակնհայտ առավելություն է եւ բարենպաստ պայման, քանզի կա փայլուն բարեկամություն նոր հայրենիքի` Ռուսաստանի եւ պատմական հայրենիքի` Հայաստանի միջեւ: Ավելին` կա փոխըմբռնման եւ փոխվստահության այնպիսի աստիճան, որը կարող է օրինակ դառնալ շատերի համար":

Խոսելով Հայաստանի ներկա քաղաքական ու տնտեսական վիճակի մասին, Սերժ Սարգսյանն ասել է. "Դուք իհարկե տեղյակ եք, որ մենք սառեցրել ենք հայ-թուրքական արձանագրությունների վավերացման գործընթացը: Դրա հիմնական պատճառը շատ պարզ է. Թուրքիան այսօր պատրաստ չէ վավերացնել արձանագրությունները: Դրա տապալումն արդարացնելու նպատակով նա նորանոր նախապայմաններ է առաջ քաշում: Ավելին` նա փորձում է ներխուժել մի ոլորտ, ես նկատի ունեմ Արցախյան հարցի լուծման գործընթացը, որտեղ ակնհայտորեն անելիք չունի: Ոչ հուսալի եւ անվստահելի գործընկերոջ հետ, որ պարբերաբար խախտում է նախնական պայմանավորվածությունները, մենք ներկա պահին խոսելիք չունենք: Վստահ եմ, որ հիշում եք իմ համահայկական ուղեւորության ընթացքում հենց այստեղ` Դոնի Ռոստովում, ունեցած մեր հանդիպման ժամանակ հնչած մտքերը, մտահոգություններն ու գաղափարները: Ժամանակը ցույց տվեց, որ Եվրոպայի վերջին փակ սահմանը բացելու համար մենք մեր կողմից արեցինք առավելագույնը, իսկ Թուրքիան պատրաստ չէ դրան: Ինչ վերաբերում է Լեռնային Ղարաբաղի խնդրին, ապա մենք աներկբա հնչեցրել ենք, որ Արցախի ժողովրդի ինքնորոշման իրավունքը մենք չենք պատրաստվում սակարկել որեւէ մեկի հետ":

Հայաստանի ղեկավարը խոսել է նաեւ երկրի ներքին կյանքի, գլոբալ ֆինանսատնտեսական ճգնաժամի հետեւանքների հաղթահարման եւ տնտեսության վերականգնման մասին:

Ավարտելով խոսքը` Նախագահ Սարգսյանն ասել է. "Մենք մեր պատմությունն ենք կերտում: Պատմություն, որ նոր շունչ է առել Հայաստանի անկախացմամբ: Պատմություն, որի նոր էջերը գրելու ենք բոլորս միասին: Եվ գրելու ենք լավ ձեռագրով, գրելու ենք այնպես, որ սերունդները հետագայում հպարտանան մեր ձեռքբերումներով: Ժամանակն աշխատում է նրանց օգտին, ովքեր խելամտորեն են օգտագործում այդ ժամանակը, ովքեր ճիշտ են բաշխում իրենց ուժերը: Աշխատենք ձեռք ձեռքի տված` Հայաստան-Արցախ-Սփյուռք եռամիասնությամբ, աշխատենք ճիշտ, եւ ժամանակը կաշխատի մեր օգտին, կդառնա մեր դաշնակիցը":

Դոն Ռոստով աշխատանքային այցի երկրորդ օրը Նախագահ Սերժ Սարգսյանն այցելել է Ստարոչերկասսկի պատմաճարտարապետական թանգարան-արգելոց, եղել "Ատամանսկոյե պոդվորյե" ցուցահանդեսում եւ "Վոյսկովոյ Վոսկրեսենսկի" տաճարում:

← Վերադառնալ