Մամլո հաղորդագրություններ
Նախագահն ընդունել է Քեմբրիջի գնահատման և միջազգային կրթության կենտրոնի գործադիր տնօրենին

09.10.2017

Նախագահ Սերժ Սարգսյանն այսօր ընդունել է Քեմբրիջի գնահատման և միջազգային կրթության կենտրոնի գործադիր տնօրեն Մայքլ Օ՛Սալիվանին:

Նախագահը ողջունել է հյուրին և կարևորել կրթության գերազանցության ազգային ծրագրի շրջանակներում «Այբ» կրթական հիմնադրամի ու ծրագրի միջազգային գործընկեր Քեմբրիջի համալսարանի գնահատման և միջազգային կրթության կենտրոնի միջև համագործակցությունը: Հանրապետության Նախագահի համոզմամբ՝ այդ համագործակցությունը Հայաստանին կօգնի նոր թափ հաղորդել հանրակրթության ոլորտում իրականացվող բարեփոխումներին, որոնց նպատակն է միջազգային չափանիշներին համապատասխանող որակյալ կրթության տրամադրումն աշակերտներին: Սերժ Սարգսյանն ընդգծել է, որ այս նպատակին հասնելու համար Հայաստանը պատրաստ է ակտիվ ջանքեր ներդնել և վճռական է սկսված բարեփոխումները հետևողականորեն շարունակել ու տարածել ամբողջ հանրապետությունում: Նախագահն այդ նպատակների իրականացման գործում կարևորել է Կրթության գերազանցության ազգային ծրագրի շրջանակներում «Արարատյան Բակալավրիատ»-ի ներդրումը՝ միտված հայկական կրթական լավագույն ավանդույթների և ժամանակակից կրթության առաջատար փորձի հիման վրա միջազգային ճանաչելի և մրցունակ համակարգի ձևավորմանը:

Մայքլ Օ՛Սալիվանը նշել է, որ Քեմբրիջի գնահատման և միջազգային կրթության կենտրոնն աշխատում է աշխարհի բազմաթիվ երկրների կրթական համակարգերի բարեփոխման՝ լավագույն փորձի տեղայնացմամբ՝ ոչ կրկնօրինակմամբ, նոր կրթական համակարգ ձևավորելու ուղղությամբ և նրա խոսքով, Հայաստանում ստեղծված են լավագույն հիմքերը նման բարեփոխումների իրականացման համար: Քեմբրիջի գնահատման և միջազգային կրթության կենտրոնի գործադիր տնօրենը շեշտել է, որ Հայաստանում՝ ի դեմս «Այբ» կրթական հիմնադրամի իրենք ունեն լավ գործընկեր, ում հետ համագործակցությամբ հնարավոր է իրականացնել անհրաժեշտ բարեփոխումները:

← Վերադառնալ


Նամակ
Նախագահին

Այս բաժինը հնարավորություն է տալիս գրավոր արտահայտել ձեր կարծիքը, տեսակետը և դիրքորոշումը: Էլեկտրոնային տարբերակով ՀՀ Նախագահին հղած նամակները չեն կարող համարվել պաշտոնական, դրանք բացառապես տեղեկատվական բնույթ ունեն եւ ենթակա չեն պաշտոնական ընթացակարգով քննության: