16
11, 2017

Նախագահի նստավայրում տեղի է ունեցել ՏՏ ոլորտում համաշխարհային ներդրման համար ՀՀ Նախագահի 2017թ. մրցանակի հանձնման արարողությունը

Նախագահի նստավայրում այսօր երեկոյան տեղի է ունեցել տեղեկատվական տեխնոլոգիաների ոլորտում համաշխարհային ներդրման համար ՀՀ Նախագահի 2017 թվականի մրցանակի հանձնման արարողությունը, որից հետո ի պատիվ մրցանակի արժանացած «Նեսթ Լաբս» ընկերության հիմնադիր Թոնի Ֆադելի, Հանրապետության Նախագահի անունից տրվել է ընդունելություն:

Համաշխարհային տեղեկատվական տեխնոլոգիաների մրցանակաբաշխության կոմիտեի գործադիր խորհրդի նախագահ Հովիկ Մուսայելյանը միջոցառման սկզբում ներկայացրել է ՀՀ Նախագահի հրամանագրով ստեղծված՝ ՏՏ ոլորտում համաշխարհային ներդրման համար Հանրապետության Նախագահի մրցանակի նախապատմությունը, մրցանակաբաշխության կոմիտեի և միջազգային ընտրող հանձնաժողովի գործունեության սկզբունքները, մինչ այժմ այդ պատվավոր մրցանակին արժանացած աշխարհահռչակ անձանց, անդրադարձել նաև Հայաստանի տնտեսության գիտատար ոլորտներից մեկի՝ տեղեկատվական տեխնոլոգիաների ոլորտում Հայաստանի մրցակցային առավելություններին, դեռևս Խորհրդային Հայաստանում այս ոլորտում եղած մեծ ներուժին, որը հետագայում ամուր հիմք հանդիսացավ ոլորտի զարգացման համար: Հովիկ Մուսայելյանը խոսել է նաև ՏՏ ոլորտի զարգացման խրախուսմանն ուղղված պետություն-մասնավոր հատված նախաձեռնությունների մասին, որոնցից շատերն արդեն պարբերական բնույթ են ստացել:

Հանդիսավոր արարողության ժամանակ մրցանակաբաշխության հանձնաժողովի անդամ Թոնի Մորոյանը ներկայացրել է այս տարվա մրցանակակրի կենսագրությունը, ներդրումը ՏՏ ոլորտում:
Նախագահ Սերժ Սարգսյանը մրցանակը հանձնել է Թոնի Ֆադելին և այդ առիթով հրավիրած ընդունելության ժամանակ հանդես է եկել ելույթով:

Մրցանակի արժանանալու կապակցությամբ իր շնորհակալական խոսքն է հղել մրցանակակիր Թոնի Ֆադելը:
 


***

Նախագահ Սերժ Սարգսյանի խոսքը ՏՏ ոլորտում համաշխարհային ներդրման համար ՀՀ Նախագահի մրցանակի շնորհման արարողության ժամանակ
 

Հարգելի՛ պարոն Ֆադել,

Հարգելի՛ բարեկամներ,

Մենք այս երեկո հավաքվել ենք շնորհավորելու և ըստ արժանվույն գնահատելու մի մարդու, որը երիտասարդ տարիքում արդեն զգալի ներդրում է ունեցել տեղեկատվական տեխնոլոգիաների զարգացման գործում: Ես այսօր ուրախությամբ եմ հանձնում «Տեղեկատվական տեխնոլոգիաների ոլորտում համաշխարհային ներդրման համար» Հայաստանի Հանրապետության Նախագահի մրցանակը «Նեսթ Լաբս» ընկերության հիմնադիր Թոնի Ֆադելին։ Նա հիրավի այն մարդկանցից մեկն է, որոնք այս թվային դարում ձևավորում են մեր առօրյան ու կենսակերպը:

Հազարամյակների պատմության ընթացքում հայ ժողովուրդը մշտապես ձգտել է յուրացնել և իր միջավայրում տեղայնացնել աշխարհում եղած առաջադեմ ամեն ինչ: Այս մրցանակը ևս այդ մտածողության, աշխարհընկալման և մեր՝ նման ձգտումների դրսևորումներից մեկն է:
Արդեն մոտ մեկ տասնամյակ է՝ մեր երկիրը շարժվում է տեղեկատվական տեխնոլոգիաների համաշխարհային շուկայում հաստատուն տեղ զբաղեցնելու և նոր բարձունքներ գրավելու ուղղությամբ: Այս ոլորտում աշխատում են շուրջ 600 ընկերություններ, որոնց շարքում են նաև բազմաթիվ աշխարհահռչակ կազմակերպությունների գրասենյակներ: Այսպիսով լուծվում է գրեթե 20 հազար մարդու աշխատանքային զբաղվածության խնդիրը: Մենք արդեն մի քանի տարի է՝ այս բնագավառում արձանագրում ենք միջինը 20-25 տոկոս աճ:
Զարգացման նման տեմպերը պահպանելով՝ մենք չպետք է սահմանափակվենք եղած ցուցանիշներով: Մենք պետք է երազենք, մտածենք և նոր ծրագրեր ստեղծենք ու իրականացնենք: Տեղեկատվական տեխնոլոգիաների ոլորտում աշխատող ընկերությունների քանակը պետք է հասնի հազարների, իսկ աշխատակիցների թիվը՝ հարյուր հազարների:

Դրա համար մեզ անհրաժեշտ է մասնագիտական կրթության դինամիկ համակարգ, և այս ուղղությամբ մենք դեռ շատ անելիք ունենք: Տասնամյակներով ձևավորված ավանդույթները և անկոտրում կամքով օժտված երիտասարդությունն ամուր հիմք են ծառայելու նշված նպատակներին հասնելու համար: Դա է իմ տեսլականը:
Մենք ունենալու ենք բազմաթիվ նոր մասնագետներ, որոնք առաջ են տանելու մեր երկիրը ինչպես իրենց աշխատանքի, այդպես էլ երկրում եղած ընդհանուր մթնոլորտը փոխելու առումով: Նրանք կոտրում են մեր հասարակությունում երբեմն գլուխ բարձրացնող «փոքր երկիր» լինելու հոգեբանական կաղապարները: Այս ոլորտում աշխատող կանանց և տղամարդկանց գործուն մասնակցությամբ մենք հաստատուն քայլերով գնում ենք դեպի գիտելիքի և բարձր տեխնոլոգիաների վրա հենված զար-գացած տնտեսություն՝ ինտելեկտուալ Հայաստան կառուցելու մեր նպատակին ընդառաջ:

Հարգելի՛ գործընկերներ,

Կարծում եմ, որ մեր մասնագետների համար ուսանելի պետք է լինեն «այՓոդ» նվագարկիչների կամ այլ նորարարությունների մեջ պարոն Ֆադելի լուծումները: Նա խորդուբորդ ճանապարհներ է անցել, դժվարություններ հաղթահարել, բազմաթիվ նոր դասեր սերտել ու հաջողել:

Տեղեկատվական տեխնոլոգիաների աշխարհում կան, իհարկե, բազմաթիվ խոշոր դերակատարներ: Սակայն հաջողության են հասնում նաև նորարարական գաղափարներ ունեցող մասնագետները և փոքր խմբերով ստեղծվող սկսնակ ընկերությունները:

Նման ստարտափներին նոր եռանդ հաղորդելու նպատակով Հայաստանի գիտության և տեխնոլոգիաների հիմնադրամի՝ ՖԱՍՏ-ի հովանու ներքո ներկայումս ներդրվում են դրամաշնորհային-վենչուրային ֆինանսավորման նոր գործիքներ: Դրանք, վստահ եմ, օգտակար կլինեն մեր տաղանդաշատ գիտնականների ու գործարարների համար, կնպաստեն նրանց գործունեությանը և թույլ կտան հասնել բաղձալի արդյունքների:
Մենք հաստատակամ ենք պետություն-մասնավոր հատվածի համագործակցությամբ այս ուղղությամբ նոր հնարավորություններ ստեղծելու գործում: Տեղեկատվական տեխնոլոգիաների ոլորտը պետք է դառնա մեր տնտեսության շարժիչ ուժերից մեկը:
Այս ոլորտում վաղուց արդեն դուրս ենք եկել մրցակցության միջազգային ասպարեզ և բավական վստահ ենք մեր ուժերում՝ առաջատարների հետ մրցակցության մեջ չընկրկելու համար: Հաջողությունների բազմաթիվ պատմություններ ունենք, սակայն ամենահուզիչը Արագածոտնի մարզի Կարբի գյուղի մեր դպրոցական աղջիկների վերջին հաղթանակն է: Այս և բազմաթիվ այլ օրինակներ մեզ վստահություն են ներշնչում վաղվա օրվա հանդեպ:

Հարգելի՛ պարոն Ֆադել,

Այս մրցանակով մենք ցանկանում ենք նշանավորել Ձեր և Ձեր ղեկավարած թիմերի ձեռքբերումները՝ «այՓոդ» նվագարկիչների, «այՖոնների», թերմոկարգավորիչների, երեխաների համար անվտանգ և խելացի խաղալիքների ստեղծման և այլ ոլորտներում:

Հուսով եմ, որ Հայաստանում գտնվելու օրերին Ձեր հաջողության պատմությունը կկարողանաք ներկայացնել մեր ուսանողներին և մասնագետներին ու քաջալերել նրանց հասնելու նոր բարձունքների: Ես չգիտեմ՝ 3-4 տարեկան հասակում տանը, Ձեր պապիկի, Ձեր հայրիկի հետ միասին վարդակները փոխելիս, որքան է զարգացել Ձեր հետաքրքրասիրությունը: Սակայն Ձեր նորարարական գաղափարները կենսագործելու ցանկությամբ տոգորված և նույնիսկ 80 գործարարից 80 մերժում ստանալուց հետո՝ Դուք, այնուամենայնիվ, չեք դադարել հավատալ Ձեր ուժերին և ի վերջո հասել եք հաջողության:
Ըստ իս, առաջին և կարևոր դասը, որ Ձեր պատմությունը կարող է առաջարկել մեզ, հետևյալն է. ձախողումները բաղձալի նպատակին հասնելու ևս մեկ փուլ են: Ձախողումը մի նոր քայլ է դեպի հաջողություն, ձախողումից պետք է եզրակացություններ կատարել և առաջ ընթանալ՝ խուսափելով նախորդ սխալներից: Իմիջիայլոց, այս մոտեցումը հատուկ է ոչ միայն տեղեկատվական տեխնոլոգիաների ոլորտին, այլ շատ ոլորտներին՝ քաղաքականությունից մինչև գործարարություն և այլ ոլորտներ:

Հարգելի՛ տիկնայք և պարոնայք,

Մենք արդեն 8-րդ անգամ ենք շնորհում այս մրցանակը տեղեկատվական տեխնոլոգիաների ոլորտում հեղափոխական փոփոխություններ առաջարկած և իրականացրած անհատներին: Նախորդ տարիներին արդեն ականատես ենք եղել, թե ինչ խանդավառությամբ են հատկապես մեր երիտասարդները հանդիպում և շփվում իրենց հերոսների հետ:
Մեր մրցանակակիրները հիանալի օրինակ են, թե ինչպես է հնարավոր աշխարհը դարձնել ավելի լավը՝ հեշտացնելով մարդկանց կյանքը և նրանց միջև շփումները:

Բոլորիս անունից ևս մեկ անգամ շնորհավորում եմ պարոն Ֆադելին և շնորհակալություն հայտնում նրա վաստակի համար, որովհետև այն համամարդկային է, և նրա վաստակից օգտվում ենք շատերս: 

 

***

Թոնի Ֆադելի խոսքը ՏՏ ոլորտում համաշխարհային ներդրման համար ՀՀ Նախագահի մրցանակի շնորհման արարողության ժամանակ

Բարի երեկո,

Սա շատ ազդեցիկ սրահ է: Երբ ես ներս մտա, շատ զարմացա տեսնելու բոլորիդ, տեսնելու, որ այս հրաշալի մարդկանց խումբն ինձ է սպասում, շնորհակալություն:

Առաջինը` ես կցանկանայի շնորհակալություն հայտնել Ձեզ՝ պարո՛ն Նախագահ, կցանկանայի նաև շնորհակալություն հայտնել վարչապետին, այն հանձնաժողովին, որ ինձ առաջադրել ու ընտրել է այս մրցանակի համար: Ինձ համար մեծ պատիվ է, որ ես կարող եմ գալ այստեղ և կիսվել ձեզ հետ իմ պատմություններով:

Իսկ դուք իրապես հավատում եք, որ գտել եք այն ուղին, որով կարող եք ձեր երկիրն առաջ շարժել, տեսնել թե որտեղ է այն եղել, որտեղ է այսօր և ուր է գնում: Ուստի, շնորհակալություն բոլորիդ, հատկապես՝ Թոնի Մորոյանին, ով մի քանի տարիների ընթացքում ինձ հաստատակամորեն կոչ էր անում գալ: Մենք իրար գիտենք 25 տարի, ինձ համար իրապես պատիվ է այստեղ լինելը: Միայն անցած 24 ժամերի ընթացքում լինելով այստեղ՝ ես պարզեցի, որ այն ամեն ինչ լսել եմ Թոնիից Հայաստանի մասին, ճշմարիտ է եղել, իսկ իմ շատ նախապաշարմունքներ ուղղակի դեն նետվեցին: Ուստի, ինձ համար մեծ պատիվ է լինել այստեղ և կրկին շնորհակալություն այս պարգևի համար:

Կցանկանայի մի քանի խոսք ասել հաջողության վերաբերյալ իմ դիտարկումների առումով, որոնք ես նկատել եմ ՏՏ ոլորտում իմ 25-30 տարվա կարիերայի ընթացքում: Խնդիրը հաջողության համար համապատասխան միջավայր ստեղծելն է: Երեք կարևոր հանգամանքներ կան, որոնց մասին Նախագահն արդեն նշեց, և դրանցից առաջինը կրթությունն է՝ կրթություն բոլոր մակարդակներում՝ նախնական կրթությունից մինչև հետբուհական և դրանից էլ այն կողմ: Աշխարհը փոփոխվող վայր է, այն այժմ փոխվում է ավելի արագ, քան երբևէ:

Աշխարհն այսօր ամենադանդաղ իրավիճակում է, քան այն այլևս երբևէ կլինի, փոփոխությունները միայն արագանալու են՝ տեխնոլոգիաների և մարդկանց, աշխարհի քաղաքացիների միջոցով՝ ոչ միայն իրենց կրթության, այլև իրենց ամենօրյա կյանքի միջոցով: Ուստի, որքան ծրագրեր ստեղծեք շարունակաբար կրթվելու, ձեր բնակչությանը կրթելու համար, այնքան ավելի լավ վիճակում կլինի ձեր տնտեսությունը, իսկ դա հնարավորություն կտա նորարարություններին այնպես ծաղկել, ինչպես երբևէ չեք տեսել:

Երկրորդ հարցը վերաբերում է կառավարությանը, կառավարության առաջնորդությանը: Կարող եմ պատմել ԱՄՆ-ի և առաջնորդության մասին պատմություններ, սակայն չեմ մտնի դրա մեջ: Այսօր կառավարություններն ունեն կարողություններ տեխնոլոգիաները ոչ միայն կիրառել հենց կառավարությունների ներսում, այլ օգտագործել դրանք թվային հասարակություն ստեղծելու համար, ստեղծել օրենքներ, կարգավորումներ և աշխատել պետություն-մասնավոր գործընկերության շրջանակներում՝ սահմանելու համար, թե ինչ է թվային հասարակությունը:


Այսինքն՝ թե ինչպես ենք մենք տեխնոլոգիան կիրառելու, ինչ է նշանակում մասնավոր գաղտնիքի պաշտպանություն, ինչ է նշանակում անվտանգություն, տվյալների մատչելիության բնակչության բոլոր խմբերի համար: Ես հավատացած եմ, որ Հայաստանը դա ունի: Վարչապետի հետ խոսելուց հետո, Նախագահի հետ խոսելուց հետո ես հավատում եմ, որ դուք ճիշտ ուղու վրա եք, որպեսզի կերտեք թվային հասարակություն, այնպիսին ինչպիսին աշխարհը երբևէ չի տեսել, քանի որ դուք ունեք այստեղ միկրոտիեզերք, և եթե դիտարկեք ձեր ստարտափերը, նրանք միշտ սկիզբ են առնում փոքր թիմով:

Դուք ունեք փոքր պետություն, բայց այն կարող է մեծանալ իր ուժերից ավելին անելով, եթե օգտագործեք ձեր ունեցած միկրոտիեզերքը, ձեր ունեցած այս համայնքը և առաջնորդեք, չգնաք ուրիշի հետևից, չկրկնօրինակեք տեխնոլոգիաները, այլ մտածեք, թե ինչպիսին կարող է լինել ձեր հասարակությունը և աշխատեք այդ ուղղությամբ ամեն օր: Եվ ի տարբերություն ստարտափերի, ես գիտեմ հայ ժողովրդի աշխատասիրությունը: Կառավարությունը մասնակցելու է դրանց 10, 20 տարի հետո էլ, եթե լինեն վայրիվերումներ դուք կհասնեք դրան, քանի որ կառավարությունն այդ աշխատանքը շարունակելու է, և այս աշխարհայացքով դուք կունենաք տարբեր ստարտափեր և կկարողանաք ստեղծել թվային հասարակություն բոլորի համար: Հուսով եմ, որ ես դրան ականատես կլինեմ:

Երրորդ գործոնը պետականի և մասնավորի գործընկերությունն է: Շատ կարևոր է, որպեսզի բաց լինեք ինձ նման մարդկանց, ներդրողներին, թիմերին, մենթորներին ձեր հասարակությունում ընդունելու համար, ինչպես նաև ձեր ներկայացուցիչներին ուղարկեք մեզ մոտ, որպեսզի մենք կարողանանք սովորել, հաղորդակցվել և աշխարհից լավագույնը քաղել, որովհետև ես հավատացած եմ, որ եթե թվային հասարակությունը կերտեք մյուս երկրներից շուտ, աշխարհը ձեզ կսկսի ուսումնասիրել՝ հասկանալու համար, թե ինչպես է դա պետք ճիշտ ձևով անել: Չինաստանը դա այսօր փորձում է անել: Չեմ կարծում, որ իրենք համամարդկային ձգտումներին համահունչ ամեն ինչ են ճիշտ անում, բայց դուք կարող եք դա անել:

Ես հավատում եմ, որ այս երեք գործոններն են ձեզ առաջ մղելու և ստեղծելու նոր աշխարհ այստեղ և շարունակելու այն հաջողությունը, որ դուք ունեցել եք վերջին 25 տարիներին: Այդքանով հանդերձ, դժվար է:

Կարիերայիս առաջին 10-15 տարիներին շատ բաներ եմ սովորել, բայց ընթացքում անընդհատ ձախողվում էի, և պահանջվում է ձեռնարկատիրոջ ուժ, ինստիտուտների ուժ հասկանալու համար, որ դուք փորձելու եք, դուք ձախողվելու եք, բայց դուք պետք է սովորեք և շարունակեք առաջ գնալ, չպետք է կանգնեք՝ պետք է շարունակեք փորձել, որովհետև երբ դուք համոզված եք, որ ձեր համոզմունքն է ճիշտ, դա է ապագան՝ մի օր այդ համոզմունքին կհասնեք, եթե միայն շարունակեք ճանապարհին սովորել:

Եվս մեկ անգամ ես ձեզ մարտահրավեր եմ նետում, հուսով եմ կվերադառնամ, հուսով եմ ինչ-որ կերպ կօգնեմ ձեզ ստեղծելու այդ թվային հասարակությունը, ցույց տալու աշխարհին, թե ինչ է իրականում նշանակում հաջորդ հազարամյակին պատրաստ լինել:

Ձեր երկիրը, ձեր ժողովուրդը ապրել է հազարամյակներ, դուք այբուբեն եք ստեղծել հազարամյակներ առաջ, առաջին պետությունն եք աշխարհում, որ քրիստոնեություն եք ընդունել, այդպես էլ կարող եք թվային հասարակությունն ընդունել, որը թվային աշխարհում բոլորի համար հավասարություն կապահովի և կրկին դուք հիմք կդնեք, ինչպես որ արել եք անցյալում:

Եվս մեկ անգամ շնորհակալություն ձեզ այս մրցանակի համար, պատիվ է այստեղ լինել, շնորհակալություն, պարո՛ն Նախագահ: Շնորհակալություն բոլորին և հուսով եմ, որ այսօր երեկոյան քննարկումներ կունենանք: Շնորհակալություն:

 

← Վերադառնալ