Նախագահ Սերժ Սարգսյանի աշխատանքայի այցը Յալթա

Նախագահ Սերժ Սարգսյանը եւ Ամենայն Հայոց Կաթողիկոս Ն.Ս.Օ.Տ. Տ Գարեգին Երկրորդը հուլիսի 29-ին Ղրիմում մասնակցել են հին հայկական Սուրբ Խաչ վանական համալիրի հիմնադրման 650-ամյակին նվիրված միջոցառմանը, որին ներկա են գտնվել Ղրիմի Ինքնավար Հանրապետության խորհրդարանի եւ կառավարության ղեկավարները, Ուկրաինայի հայկական համայնքի հազարավոր ներկայացուցիչներ, հոգեւոր — աշխարհիկ այրեր:

Վեհափառ Հայրապետի ձեռամբ կատարվել է Սուրբ Նշան եկեղեցու օծման արարողությանը:

Նախագահ Սերժ Սարգսյանը հանդես է եկել ելույթով: Նա իր խոսքում ասել է.

«Ես ուրախ եմ ձեզ հետ միասին ներկա գտնվելու հայկական Սուրբ Խաչ հինավուրց համալիրի հիմնադրման 650-րդ տարեդարձին նվիրված արարողությանը: Այս նշանակալից իրադարձությունը միավորել Է մեզ բոլորիս:

Ղրիմի թերակղզին միշտ եղել եւ մնում Է տարբեր ժողովուրդների ներկայացուցիչների, տարբեր դավանաքների հետեւորդների բնակության վայր:

Խորհրդանշական Է, որ այս հոբելյանը եւ վերականգնված տաճարի օծումը համընկել են նշանակալի եւ հանդիսավոր տարեթվի՝ Ռուսիայի մկրտության 1020-ամյակի հետ:

Հայաստանյաց Առաքելական եկեղեցին միշտ էլ առանձնահատուկ դեր Է խաղացել մեր ժողովրդի կյանքում: Դարեր շարունակ պետականության բացակայության պայմաններում հենց եկեղեցուն էր վիճակված ստանձնել առաջնորդության առաքելությունը հայ ժողովրդի պատմական ճանապարհին: Եվ պատահական չէ, որ աշխարհի որ մասում էլ հայերը գտնվելիս լինեն, նրանք միշտ կառուցել են եկեղեցիներ ու դպրոցներ: Կառուցել են եւ ստեղծագործել, պայքարել են ու գոյատեւել:

Արդյունքում՝ ի տարբերություն շատ հնագույն ժողովուրդների, հայերը շարունակում են ապրել ու արարել՝ աշխարհին ներկայացնելով իրենց մշակութային ժառանգության բազմազանությունն՝ արվեստի գործեր, որոնցից շատերը բարեկամության ու համագործակցության խորհրդանիշ են դարձել:

Սուրբ Խաչ համալիրը Ղրիմի հայերի հոգեւոր կենտրոնն է, հայկական առավել նշանակալի պատմական հուշարձաններից մեկը: Այսօր, երբ մեր շուրջը տեսնում ենք անհանդուրժողության, միջդավանական ու միջմշակութային հակամարտությունների ու դիմակայությունների հազարավոր օրինակներ, մենք վկան ենք դառնում այն բանի, թե ինչպես են ոչ թե խոսքով, այլ` գործով մեր ժողովուրդներն անկեղծորեն ու համոզվածությամբ վերադառնում իրենց պատմության այն ընդհանուր էջերին, երբ նրանք ոչ միայն գոյակցում էին աշխարհագրական նույն տարածքում, այլեւ` միասին արարում էին ու ստեղծագործում:

Սուրբ Խաչը ոչ միայն մեր հոգեւոր մշակույթի անքակտելի մասն է, այլեւ` Ղրիմի թերակղզու մարգարիտներից մեկը: Ցանկացած ճարտարապետական հուշարձան ներդաշնակ է միայն այն համատեքստում եւ այն լանդշաֆտում, որում այն ստեղծված է: Վստահ եմ, որ վերականգնված Սուրբ խաչ համալիրը կարող Է դառնալ Ղրիմի հիանալի տուրիստական երթուղիների հոյակապ լրացումը: Ես այսօր Ուկրաինայի նախագահ Վիկտոր Յուշչենկոյին առաջարկեցի՝ մեր արտաքին գործերի նախարարություններին հանձնարարել՝ համատեղ քայլեր ձեռնարկել Սուրբ խաչն ընդգրկելու ՅՈՒՆԵՍԿՕ-ի համաշխարհային ժառանգության մեջ:

Մենք արդեն այս ուղղությամբ հաջող օրինակներ ունենք: Բոլորովին վերջերս Իրանում գտնվող հայկական երեք հուշարձաններ ընդգրկվեցին այդ ցուցակում:

Մենք երախտապարտ ենք Ուկրաինայի իշխանություններին` տաճարի վերականգնման ազնիվ աշխատանքի համար, Ղրիմի իշխանություններին, ճարտարապետներին ու շինարարներին, ովքեր իրականացրել են այս նախագիծը:

Ես կուզենայի շնորհավորել նաեւ Ուկրաինայում, եւ մասնավորապես Ղրիմում, բնակվող մեր հայրենակիցներին եւ շնորհակալություն հայտնել նրանց` եկեղեցու վերականգնմանն ակտիվ մասնակցելու համար:

Վստահ եմ, որ այսօրվա իրադարձությունն, ավելացնելով նոր էջ մեր ժողովուրդների միջեւ բազմադարյա բարեկամական հարաբերությունների փառավոր պատմության տարեգրության մեջ, խթան կլինի հայ-ուկրաինական հարաբերությունների հետագա ընդլայնման եւ խորացման համար ոչ միայն հումանիտար, այլ նաեւ` քաղաքական, տնտեսական եւ մեր համագործակցության մյուս ոլորտներում:

Վերականգնված Սուրբ Խաչ համալիրին ցանկանում եմ երկար տարիներ, որպեսզի հետագա 650 տարիները եւս այն շարունակի լինել ոչ միայն հավատի եւ հույսի տաճար, այլեւ` ժողովուրդների եւ կրոնների փոխըմբռնման, համաձայնության եւ բարեկամության խորհրդանիշ:

Շնորհավորում եմ բոլորին այս նշանակալից իրադարձության առիթով եւ ցանկանում եմ եւս մեկ անգամ սրտանց շնորհակալություն հայտնել բոլոր մասնակիցներին` այս հրաշալի վանական համալիրի պահպանման ու վերականգնման, ջերմության ու գրկաբացության համար:


Այնուհետեւ Հանրապետության նախագահը եկեղեցուն նվիրել է Սուրբ Սեղանի խաչ, որը Մայր Աթոռ Սուրբ Էջմիածնի Սուրբ Սեղանի խաչի կրկնօրինակն է:

Սուրբ Խաչը միջնադարյան հայ ճարտարապետության նշանավոր կոթողներից է, եւ ղրիմահայ գաղթօջախի հոգեւոր կենտրոնը, որը դարեր շարունակ եղել է տեղի աթոռակալ եպիսկոպոսների նստավայրը:

* * *
Նախագահ Սերժ Սարգսյանը եւ Ամենայն Հայոց Գարեգին Երկրորդ կաթողիկոսը այցելել են նաեւ Յալթայի Սբ Հռեփսիմե եկեղեցի, որտեղ նրանք հանդիպել են ղրիմահայ համայնքի հետ ներկայացուցիչների հետ:

Նախագահ Սերժ Սարգսյանն իր ուրախությունն է հայտնել Սբ Հռեփսիմե այցելելու եւ հանդիպման համար: «Եկել ենք միասին կիսելու մեր ուրախությունը, եկել ենք ասելու, որ դուք հայրենիք ունեք, եկել ենք ասելու, որ յուրաքանչյուր հարցում ձեզ օգնելու եւ սատարելու ենք»,-դիմելով ներկաներին` ասել է ՀՀ նախագահը եւ շարունակել. «Հայաստանի Հանրապետությունը որոշակի պատասխանատվություն է կրում հայ համայնքի առջեւ: Հայաստանն իր հերթին ձեր կարիքն ունի, ցանկանում ենք, որ ձեր հայացքն ուղղված լինի դեպի Հայաստան, վստահեցնում ենք, որ ձեզնից յուրաքանչյուրը Հայաստանում տեղ եւ անելիք ունի: Հայաստանում դուք տուն ունեք»:

ՀՀ նախագահը եւ Վեհափառ Հայրապետը ծանոթացել են եկեղեցուն եւ տարվող աշխատանքներին, այցելել հանրահայտ գեղանկարիչ Վարդգես Սուրենյանցի շիրմին:

* * *
Ղրիմի Ինքնավար Հանրապետություն կատարած աշխատանքայի այցի շրջանակում նախագահ Սերժ Սարգսյանը հուլիսի 29-ին հանդիպում է ունեցել Ուկրաինայի նախագահ Վիկտոր Յուշչենկոյի հետ:

Երկու երկրների ղեկավարների առանձնազրույցն անցել է ջերմ բարեկամական մթնոլորտում:

Ուկրաինայի նախագահը վերահաստատել է իր հրավերը ՀՀ նախագահ Ս. Սարգսյանին` 2008թ. վերջին եռամսյակում պաշտոնական այց կատարելու Ուկրաինա: Նախատեսվող պաշտոնական այցից առաջ կարեւորվել է հայ-ուկրաինական միջկառավարական հանձնաժողովի նիստի անցկացումն, ինչպես նաեւ պայմանավորվածություն է ձեռք բերվել երկու երկրների միջեւ տարբեր ոլորտներում հետագա համագործակցությունը խթանող մի շարք փաստաթղթերի ստորագրման վերաբերյալ: Վ. Յուշչենկոն Ս. Սարգսյանին առաջարկել է պաշտոնական այցի շրջանակում լինել նաեւ Ուկրաինայի մարզերից մեկում:

Ս. Սարգսյանը եւ Վ. Յուշչենկոն ընդգծել են հայ-ուկրաինական տնտեսական կապերի հետագա աշխուժացման անհրաժեշտությունն, ինչին կնպաստի առաջիկայում հայ-ուկրաինական գործարար համաժողովի անցկացումը:

Կողմերը շեշտել են նաեւ ապրանքաշրջանառության ծավալների մեծացման եւ միջմարզային փոխգործակցության խթանման կարեւորությունը:

Նախագահների առանձնազրույցի ընթացքում քննարկվել են նաեւ հումանիտար ոլորտում համագործակցությանը, մշակույթի, գիտության եւ կրթության բնագավառներում առկա ներուժի ամբողջական իրացմանն առնչվող խնդիրներ: Նախագահ Վ. Յուշչենկոն ընդգծել է ուկրաինահայ համայնքի առանձնահատուկ ներդրումը հայ-ուկրաինական բարեկամական կապերի զարգացման եւ ամրապնդման գործում` պատրաստակամություն հայտնելով համատեղ քննարկելու Ուկրաինայի հայ համայնքին հուզող բոլոր խնդիրները:
ՀՀ նախագահը շնորհակալություն է հայտնել իր գործընկերոջը` Սուրբ Խաչ եկեղեցու վերանորոգման գործում ցուցաբերած պետական աջակցության համար:

Երկու երկրների ղեկավարներն անդրադարձել են նաեւ տարածաշրջանային եւ միջազգային տարբեր խնդիրների: