Նախագահ Սերժ Սարգսյանի պաշտոնական այցը Սիրիա

Նախագահ Բաշար ալ-Ասադի հրավերով մարտի 22-ից 24-ը եռօրյա պաշտոնական այցով Սիրիայի Արաբական Հանրապետությունում է եղել Հայաստանի Հանրապետության Նախագահ Սերժ Սարգսյանը տիկնոջ` Ռիտա Սարգսյանի հետ:

ՍԱՀ Ժողովրդական պալատում տեղի է ունեցել ՀՀ Նախագահի դիմավորման պաշտոնական արարողությունը, որին հաջորդել է նախագահներ Սերժ Սարգսյանի եւ Բաշար ալ-Ասադի առանձնազրույցը:

Ողջունելով ՀՀ Նախագահին` Բաշար ալ-Ասադը վստահություն է հայտնել, որ նախագահների մակարդակով փոխայցելությունները նոր խթան կհանդիսանան Հայաստանի եւ Սիրիայի միջեւ հարաբերությունների խորացման համար:

Երկու պետությունների ղեկավարների առանձնազրույցին հաջորդել է պաշտոնական պատվիրակությունների ընդլայնված կազմով հանդիպումը:

Հայաստանի եւ Սիրիայի նախագահները բարձր են գնահատել երկու երկրների միջև քաղաքական երկխոսության առկա մակարդակը:

Հայաստանի Հանրապետության Նախագահը շնորհակալություն է հայտնել Սիրիայի Նախագահին` մեր ժողովրդին պատմության օրհասական պահերին Սիրիայի ցուցաբերած անգնահատելի աջակցության համար` նշելով, որ սիրիահայ համայնքը բարեկամության հուսալի կամուրջ է երկու ժողովուրդների ու պետությունների միջև:

Սերժ Սարգսյանն ու Բաշար ալ-Ասադն անդրադարձել են Սիրիայի Արաբական Հանրապետության Նախագահի` Երևան կատարած այցի ժամանակ ձեռք բերված համաձայնությունների կատարման ընթացքին, կարևորել գործարար շրջանակների շփումների ակտիվացման անհրաժեշտությունը, ինչը հնարավորություն կտա ընդլայնել երկու բարեկամ երկրների միջև առևտրատնտեսական գործակցությունը:

Բանակցությունների ավարտից հետո Հայաստանի եւ Սիրիայի ղեկավարները հանդես են եկել մամուլի համար հայտարարությամբ, պատասխանել լրագրողների հարցերին:

Նախագահ Սերժ Սարգսյանը Սիրիա կատարած պաշտոնական այցի երկրորդ օրը հյուրընկալվել է Սիրիայի հնագույն բարձրագույն ուսումնական հաստատությունում` Դամասկոսի համալսարանում: ՀՀ Նախագահն այնտեղ հանդես է եկել հայ-սիրիական հարաբերությունների թեմայով դասախոսությամբ:

Նախագահ Սերժ Սարգսյանը հանդիպել է նաեւ Սիրիայի Ժողովրդական ժողովի նախագահ Մահմուդ ալ-Աբրաշի հետ, քննարկել հայ-սիրիական միջխորհրդարանական կապերի զարգացմանը եւ միջազգային կառույցներում համագործակցությանն առնչվող հարցեր:

Այնուհետեւ, ՀՀ Նախագահը հանդիպել է Սիրիայի Արաբական Հանրապետության վարչապետ Մուհամմադ Նաջի Օտրիի հետ: Քննարկվել են հայ-սիրիական տնտեսական կապերի ընդլայնմանն առնչվող հարցեր: Կողմերն ընդգծել են տնտեսության ոլորտում հարաբերությունների խթանման անհրաժեշտությունը եւ այդ գործում կարեւորել գործարար շրջանակների շփումների ակտիվացումը համաժողովների, ցուցահանդեսների եւ նմանատիպ այլ միջոցառումների կազմակերպման միջոցով:Նախագահ Սարգսյանը նշել է, որ Սիրիայի հայկական ստվար համայնքը կարող է կամրջի դեր կատարել նաեւ տնտեսական կապերի ակտիվացման գործում:

Սերժ Սարգսյանն այցելել է Դամասկոսի Օմայան մզկիթ, որն ի սկզբանե կառուցվել է որպես քրիստոնեական տաճար, ապա նոր միայն վերածվել մզկիթի, ինչի շնորհիվ էլ Սիրիայում այն համարվում է կրոնական հանդուրժողականության խորհրդանիշ:

ՀՀ Նախագահն այցելել է նաեւ Դամասկոսի Սուրբ Սարգիս առաջնորդանիստ եկեղեցի, որտեղ հանդիպել է հայ համայնքի ներկայացուցիչների հետ: Նախագահ Սարգսյանը նրանց հետ խոսել է հայ-սիրիական հարաբերությունների ապագայի մասին` վստահություն հայտնելով, որ այն լինելու է անխախտ եւ փայլուն` անկախ որեւէ վերադասավորումից, տարածաշրջանային ուժերի ազդեցություններից կամ այլ հանգամանքներից: Սերժ Սարգսյանի խոսքով` այդ հարաբերությունների զարգացմանը մշտապես նպաստել եւ շարունակելու է նպաստել սիրիահայ համայնքը, որի հարատեւությունն ու հզորությունը նաեւ Հայաստանի Հանրապետության ներուժի հզորացում է նշանակում:

ՀՀ Նախագահը հայ համայնքի ներկայացուցիչների հետ խոսել է նաեւ Հայաստանի զարգացման հեռանկարների,այդ ճանապարհին հաղթահարելիք դժվարությունների, Հայաստան-Թուրքիա հարաբերությունների կարգավորման, ԼՂ հիմնախնդրի լուծման ուղիների մասին: "Հայաստանը բոլորիս հայրենիքն է, եւ հայկական խնդիրները բոլորիս խնդիրներն են: Եւ սա է պատճառը, որ ամենաբարդ խնդիրների շուրջ հարմար եմ գտնում խորհրդակցել նաեւ մեր քույրերի եւ եղբայրների հետ, ովքեր ապրում են Հայաստանից դուրս",- ասել է Սերժ Սարգսյանը:

ՀՀ Նախագահ Սերժ Սարգսյանը Սիրիայի Արաբական Հանրապետություն կատարած պաշտոնական այցի երկրորդ օրը այցելել է Հալեպ քաղաք: Այստեղ Նախագահ Սարգսյանը հանդիպել է Հալեպի նահանգապետի հետ, քննարկել հայ-սիրիական համագործակցությունը նաեւ միջմարզային մակարդակով խթանելու հնարավորությանն առնչվող հարցեր:

Այնուհետեւ, ՀՀ Նախագահին հյուրընկալել է հալեպահայ համայնքը: Համայնքի ներկայացուցիչների հետ ջերմ ու անմիջական զրույցում Սերժ Սարգսյանը գոհունակություն է հայտնել Սիրիա կատարած այցի արդյունքներից եւ նշել, որ այն նոր լիցք կհաղորդի հայ-սիրիական ավանդական բարեկամական հարաբերություններին:

Նախագահ Սարգսյանն եղել է նաեւ Դեյր Զորում, հանդիպումներ ունեցել տեղական իշխանությունների ղեկավարների եւ հայ համայնքի ներկայացուցիչների հետ