Արտերկրյա այցեր
Նախագահ Սերժ Սարգսյանի աշխատանքային այցը Ռուսաստանի Դաշնություն
Աշխատանքային այցով Ռուսաստանի Դաշնությունում գտնվող Նախագահ Սերժ Սարգսյանը մայիսի 8-ին Ռուսաստանի Դաշնության, Բելառուսի, Ղրղզստանի և Տաջիկստանի հանրապետությունների նախագահների հետ ՌԴ պաշտպանության կառավարման ազգային կենտրոնում դիտել է ՌԴ Զինված ուժերի կառավարման վարժանքները, որից հետո Կրեմլում մասնակցել է նախագահներ Վլադիմիր Պուտինի, Ալեքսանդր Լուկաշենկոյի, Ալմազբեկ Աթամբաևի, Էմոմալի Ռահմոնի հետ ոչ պաշտոնական հանդիպմանը:
***
***
Նախագահ Սերժ Սարգսյանը մայիսի 8-ին Մոսկվայում հանդիպում է ունեցել Ռուսաստանի Դաշնության Նախագահ Վլադիմիր Պուտինի հետ:
Երկու երկրների նախագահները քննարկել են երկկողմ և բազմակողմ ձևաչափերով հայ-ռուսական համագործակցությանն առնչվող հարցերի լայն շրջանակ, նախանշել ռազմավարական գործընկեր երկու երկրների միջև հարաբերությունների առավել ամրապնդման ու խորացման ուղղությամբ հետագա աշխատանքները:
«Հարգելի Սերժ Ազատի, թույլ տվեք ևս մեկ անգամ ողջունել Ձեզ Մոսկվայում, շնորհակալություն հայտնել, որ մեզ այցելել եք մայիսի 9-ի նախօրեին, ևս մեկ անգամ շնորհավորել և՛ Ձեզ, և՛ ամբողջ հայ ժողովրդին՝ Հաղթանակի գալիք տոնի կապակցությամբ:
Հայաստան իմ այցելությունից հետո մեծ աշխատանք է կատարվել այցի ընթացքում ձեռքբերված պայմանավորվածությունների իրականացման ուղղությամբ: Ես ուրախ եմ Ձեզ հետ ժամացույցի սլաքներն ուղղելու հնարավորության համար, տեսնելու, թե լրացուցիչ ի՞նչ է պետք անել, որտեղ է մեզ պետք արագացնել համատեղ աշխատանքի տեմպը:
Ամեն դեպքում, հաճելի է նշել, որ Ռուսաստանը մնում է Հայաստանի առաջատար առևտրատնտեսական գործընկերը, անցյալ տարի, նախորդ տարվա համեմատ, մեզ մոտ գրեթե 11 տոկոսով (10,6 տոկոսով) աճել է ապրանքաշրջանառությունը: Եվ այս տարի ապրանքաշրջանառության աճի դրական տեմպերը և դրական դինամիկան պահպանվում են, այնպես, ինչպես Ռուսաստանը՝ որպես ներդրող, պահպանում է հայաստանյան տնտեսության մեջ առաջին տեղը»,-Նախագահ Սերժ Սարգսյանի հետ հանդիպմանն ասել է ՌԴ Նախագահ Վլադիմիր Պուտինը:
Շնորհակալություն հայտնելով ՌԴ Նախագահին ՀԱՊԿ անդամ-պետությունների ղեկավարների հանդիպման շրջանակներում Մոսկվա այցելելու հրավերի և հայ-ռուսական երկկողմ հարաբերությունների կարևորագույն հարցերի քննարկման հնարավորության համար՝ Նախագահ Սերժ Սարգսյանը փոխադարձաբար շնորհավորել է գործընկերոջը և Ռուսաստանի ժողովրդին՝ Մեծ հաղթանակի կապակցությամբ:
«Ես ուրախ եմ, որ հայ-ռուսական ռազմավարական հարաբերությունները, դաշնակցային գործընկերությունը դինամիկ կերպով զարգանում են: Մենք այսուհետ ևս առավելագույն ջանքեր կգործադրենք այդ հարաբերությունների խորացման համար:
Ձեր պետական այցի ընթացքում և սեպտեմբերի 3-ին Մոսկվայում կայացած հանդիպման ժամանակ ձեռքբերված պայմանավորվածությունները, իհարկե, հարստացրեցին մեր օրակարգը: Եվ, իհարկե, այդ պայմանավորվածությունների իրականացումը բոլոր ոլորտներում՝ և՛ արտաքին քաղաքականության, և՛ ռազմատեխնիկական, և՛ տնտեսական, սերտ համագործակցության նոր հնարավորություններ է ստեղծում: Մենք պատրաստ ենք ակտիվ աշխատանքի: Եվ ես կարծում եմ, որ միայն դա է համապատասխանում մեր ժողովուրդների միջև բարեկամության պատմական ավանդույթներին և դա է համապատասխանում մեր ժողովուրդների կամքին, ուստի մենք պատրաստ ենք: Ես ուրախ եմ, որ այսօր Մոսկվայում եմ: Շնորհակալություն հրավերի և այն զրույցի համար, որը մենք արդեն ունեցել ենք»,-ՌԴ Նախագահի հետ հանդիպմանն ասել է Նախագահ Սերժ Սարգսյանը:
***
Նախագահ Սերժ Սարգսյանը Ռուսաստանի Դաշնություն աշխատանքային այցի շրջանակներում այցելել է Մոսկվայի Նովոդևիչյե գերեզմանատանն ամփոփված Խորհրդային միության հերոսներ՝ ականավոր պետական և ռազմական գործիչ, ծովակալ Հովհաննես Իսակովի և զրահատանկային զորքերի գլխավոր մարշալ Համազասպ Բաբաջանյանի շիրիմներին: Հայրենական մեծ պատերազմում հաղթանակի նախօրեին Հանրապետության Նախագահը ծաղիկներ է դրել Մեծ հաղթանակին իրենց զգալի ներդրումն ունեցած հայ նշանավոր զորավարների գերեզմաններին և հարգանքի տուրք մատուցել նրանց հիշատակին: