08
07, 2009

ՀՀ Նախագահի աշխատակազմի ղեկավար Կարեն Կարապետյանն անցկացրել է աշխատանքային խորհրդակցություն

Ջերմուկ քաղաքի զարգացման հայեցակարգն է քննարկվել ՀՀ Նախագահի աշխատակազմի ղեկավար Կարեն Կարապետյանի այսօր անցկացրած աշխատանքային խորհրդակցության ընթացքում, որին մասնակցել են էկոնոմիկայի, քաղաքաշինության նախարարները, տարածքային կառավարման նախարարության, Վայոց ձորի մարզի, Ջերմուկ քաղաքի ղեկավարները:

Կարեն Կարապետյանն ասել է, որ քննարկվող թեման ՀՀ Նախագահի նախընտրական ծրագրի կարեւորագույն բաղկացուցիչներից է, եւ Ջերմուկ քաղաքի համալիր զարգացման առանցքային հարցերը քննարկվել են նաեւ Հանրապետության Նախագահի` անցած տարի քաղաք կատարած այցերի ընթացքում:

Էկոնոմիկայի նախարար Ներսես Երիցյանը ներկայացնելով քաղաքի զարգացման հայեցակարգը` նշել է, որ այն մշակվել է տեղական եւ միջազգային մասնագետների ուժերով եւ հնարավորություն է տալիս վերջնական տեսքի բերել քաղաքի գլխավոր հատակագիծը: Հայեցակարգի հիմնական նպատակն է Ջերմուկը դարձնել ամբողջ տարին գործող միջազգային չափանիշներին համապատասխանող առողջ եւ ակտիվ կենսակերպի զբոսաշրջային կենտրոն:

Խորհրդակցության մասնակիցները նշելով, որ մեծածավալ եւ լուրջ աշխատանք է կատարվել, ներկայացրել են փաստաթղթի ժամկետների, ֆինանսավորման, առկա խնդիրների լուծման վերաբերյալ իրենց նկատառումներն ու դիտողությունները:

ՀՀ Նախագահի աշխատակազմի ղեկավար Կարեն Կարապետյանը Ջերմուկ քաղաքի զարգացման հայեցակարգն ընդհանուր առմամբ ընդունելի համարելով, կարեւորել է դրա գործնական կիրառումը եւ հետագա քննարկումների ընթացքում փաստաթղթից բխող ծրագրավորումը: Նրա խոսքով` անհրաժեշտ է հստակ արձանագրել պետության մասնակցության չափաբաժինն` այն ամրագրելով յուրաքանչյուր տարվա պետական բյուջեում, ինչպես նաեւ նախանշել այն թիրախները, որոնք պոտենցիալ ներդրողներին կշահագրգռեն ներդրումներ կատարել Ջերմուկում:

← Վերադառնալ