09
03, 2010

Նախագահ Սերժ Սարգսյանի պաշտոնական այցը Ֆրանսիա

album picture
album picture
album picture
album picture
album picture
Մեկնարկել է Հայաստանի Հանրապետության Նախագահ Սերժ Սարգսյանի պաշտոնական այցը Ֆրանսիա: ՀՀ Նախագահի պաշտոնը ստանձնելուց ի վեր սա Սերժ Սարգսյանի առաջին պաշտոնական այցն է բարեկամ Ֆրանսիայի Հանրապետություն: Նախագահ Սարգսյանի գլխավորած պատվիրակության կազմում են արտգործնախարար Էդուարդ Նալբանդյանը, սփյուռքի նախարար Հրանուշ Հակոբյանը, ԱԺ պատգամավոր, հայ-ֆրանսիական բարեկամության պատգամավորական խմբի ղեկավար Արա Բաբլոյանը, պաշտոնատար այլ անձինք:

Պաշտոնական այցելության առաջին օրը /մարտի 9-ին/ Նախագահ Սարգսյանն այցելել է Փարիզի “Մատինյոն” ցուցասրահ, հանդիպել ֆրանսահայ ճանաչված գեղանկարիչ Ժանսեմի հետ, շրջել ցուցասրահում և ծանոթանացել նրա ստեղծագործական հարուստ ժառանգությանը: “Մեր ժողովուրդն իսկապես հպարտանում է Ձեզանով ու բարձր գնահատում Ձեր արվեստը: Ապրելով այլ երկրում` Դուք ավելի ճանաչելի եք դարձրել մեր ժողովրդին` ողջ աշխարհում տարածելով հայ ժողովրդի բարի համբավը”,- նշել է մեր երկրի ղեկավարը: Հայաստանի Հանրապետության Նախագահն ու մեր անվանի հայրենակիցը մտքեր են փոխանակել հայապահպանության ու Հայաստան-Սփյուռք կապերի ամրապնդման խնդիրների շուրջ: “Սփյուռքի նախարարության ստեղծման նպատակներից մեկն էլ արտերկրում ապրող մեր հայրենակիցների հայապահպանության խնդրի լուծմանը նպաստելն է: Մենք որպես անկախ Հայաստանի Հանրապետության իշխանություն, պետք է աշխատենք ստեղծել այնպիսի երկիր, որ հայկական ինքնությունը կրող եւ արտերկրում ապրող մեր յուրաքանչյուր հայրենակից հպարտանա իր Հայրենիքով”,- նշել է Նախագահ Սերժ Սարգսյանը:

Հայ-ֆրանսիական մշակութային կապերի ամրապնդման գործում ներդրած նշանակալի ավանդի համար, ինչպես նաև ծննդյան 90-ամյակի առթիվ ֆրանսահայ անվանի նկարիչ Ժանսեմը ՀՀ Նախագահի հրամանագրով պարգևատրվել է Պատվո շքանշանով: Նախագահ Սերժ Սարգսյանը ճանաչված նկարչին հանձնել է Հայաստանի Հանրապետության պետական բարձր պարգեւը:

Պաշտոնական այցի շրջանակում այսօր կեսօրին Ելիսեյան պալատում նախատեսված է Նախագահ Սերժ Սարգսյանի հանդիպումը Ֆրանսիայի Նախագահ Նիկոլա Սարկոզիի հետ: Ֆրանսիայի Նախագահի անունից ի պատիվ Հայաստանի Հանրապետության Նախագահի կտրվի պաշտոնական ճաշ: Այնուհետև Նախագահ Սարգսյանը կհյուրընկալվի Ֆրանսիայի Սենատի նախագահ Ժերար Լարշեին և Ազգային ժողովի նախագահ Բեռնար Ակուայեին, կհանդիպի ֆրանսահայ համայնքի ներկայացուցիչների հետ:

← Վերադառնալ