Լրատվություն
Մամուլի հաղորդագրություններ
16
10, 2010
Նախագահ Սարգսյանը մասնակցել է Տաթեւի ճոպանուղու գործարկման արարողությանը
Նախագահ Սերժ Սարգսյանը Սյունիքի մարզ աշխատանքային այցի երկրորդ օրը` հոկտեմբերի 16-ին, այցելել է Գորիսի նորակառույց սրտաբանական հիվանդանոց: Առողջապահական այս հաստատությունը նպատակ ունի արագ բուժօգնություն ցուցաբերել Հայաստանի հարավային տարածաշրջանի, ինչպես նաեւ ԼՂՀ-ի բնակչությանը:
Գորիսում Հանրապետության ղեկավարը ներկա է գտնվել նաեւ քաղաքի օրվա կապակցությամբ կազմակերպված ժողովրդական տոնակատարությանը: Տոնական միջոցառումների շրջանակում, Գորիսում բացվել է Գրիգոր Տաթեւացու արձանը:
Այսօր Նախագահ Սերժ Սարգսյանը հանդիպել է նաեւ հարյուրից ավելի սփյուռքահայ լրագրողների եւ խմբագիրների հետ, ովքեր Երկրի ղեկավարի հետ հանդիպման նպատակով Գորիս են ժամանել ԼՂՀ մայրաքաղաք Ստեփանակերտից, որտեղ մասնակցել են Լրագրողների համահայկական 5-րդ համաժողովին:
Գորիսից Նախագահը մեկնել է Հալիձոր: Այս բնակավայրից մեկնարկել է “Տաթեւի վերածնունդ” ծրագիրը: Ծրագրի շրջանակներում տեղի է ունեցել Հալիձոր եւ Տաթեւ գյուղերը միացնող աշխարհի ամենաերկար ճոպանուղու տեխնիկական գործարկման արարողությունը: Որոտանի գեղատեսիլ կիրճի վրայով ձգվող 5.7 կմ երկարությամբ ճոպանուղին նոր հնարավորություններ է բացում վանական համալիրը այցելուների համար հեշտ հասանելի դարձնելու տեսանկյունից:
Ծրագիրը նպատակաուղղված է Տաթեւի մերձակա շրջանների զարգացմանը, Հայաստանի այդ հնագույն եւ հեղինակավոր վանական համալիրի հոգեւոր, գիտական եւ մշակութային ավանդույթների երբեմնի համբավի ու փառքի վերականգնմանը:
Ճոպանուղու գործարկման արարողությանը Հանրապետության ղեկավարի հետ ներկա են եղել Ն.Ս.Օ.Տ.Տ. Գարեգին Բ Ամենայն Հայոց Կաթողիկոսը, ԼՂՀ Նախագահը, հասարակական, քաղաքական, մշակութային շրջանակների ներկայացուցիչներ, պաշտոնյաներ, հարյուրավոր հյուրեր աշխարհի տարբեր երկրներից, որոնցից շատերը ծրագրի բարերաներն են: Ճոպանուղու բացման կապակցությամբ` Նախագահ Սերժ Սարգսյանը Տաթեւում ողջույնի խոսք է հղել, որում, մասնավորապես, ասված է.
“Վեհափա՛ռ Տեր,
Հարգարժա՛ն հյուրեր,
Սիրելի՛ հայրենակիցներ,
Ողջունում եմ բոլորիդ Հայաստանի ամենագեղեցիկ վայրերից մեկում: “Տաթևի վերածնունդ” ծրագրի մեկնարկը հաճելի առիթ է կրկին այցելելու և վայելելու Սյունյաց աշխարհի անկրկնելի բնապատկերներն ու միջնադարյան հայ ճարտարապետության գլուխգործոցները: Այսօր այս բնապատկերը հարստանում է ժամանակակից ճոպանուղով, որը կոչված է նոր հմայք հաղորդելու Որոտանի կիրճին և նոր ու անջնջելի տպավորություններ պարգևելու այցելուներին:
Աշխարհի ամենաերկար ճոպանուղու կառուցմամբ մենք նպատակ չունենք որևէ մեկին զարմացնել: Մեր հետապնդած նպատակներն իհարկե համեստ են աշխարհի չափանիշներով, բայց ունեն բացառիկ կարևորություն Տաթևի ու նրա հարակից տարածքների համար: “Տաթևի վերածնունդ” ծրագիրը Հայաստանի հարավի համակողմանի զարգացման ռազմավարության նշանակալի բաղադրիչ է, ինչպես նաև լուրջ ազդակ այս շրջանի տնտեսական, գիտական ու մշակութային կյանքի աշխուժացման համար:
Սա պետական և մասնավոր հատվածների համագործակցությամբ խոշորագույն նախաձեռնություններից է, որ այսօր իրականացվում է Հայաստանում: Սյունյաց անկրկնելի բնության այս չքնաղ ձորը նախ կտրել-անցել է մարդկային միտքը: Հետո հսկայական թռիչքի այդ միտքը ոգևորել է բազում մարդկանց: Այսօր էլ թռիչքի հերթն արդեն կառուցված ճոպանուղունն է, որը միացրեց պատմությունն ու ապագան, ավանդականն ու ժամանակակիցը, մշակույթն ու բիզնեսը: Գործող ճոպանուղին կենդանի վկայությունն է այն բանի, որ նույնիսկ ամենաանհավանական թվացող երազները հաստատապես կարելի է իրականություն դարձնել, և բոլոր դժվարություններն աներկբա տեղի են տալիս, երբ կա հստակ նպատակադրում, կա վարակիչ ոգևորություն, կա հավատ, որ ճիշտ ու կարևոր բան ես անում:
Տիկնա՛յք և պարոնա՛յք,
Այսօր նշանավոր ու տոնական առիթով մենք գտնվում ենք հայ ժողովրդի բնօրրաններից, հազարամյակների հայոց մշակույթի և գիտական մտքի հնագույն օջախներից մեկում` Սյունիքում: Այստեղ անցյալն ամփոփվում է ապագայի լույսով: Այստեղ վերքերը լռել, իսկ քարերը խոսել գիտեն: Շատերն են երազել ու շարունակում են երազել այս հողում սեփական բիրտ հետքը թողնել, որ սովորաբար ավերածությունների հետքն է: Բայց այստեղ մշտապես իշխել ու իշխելու են հայոց կոթողները, իսկ քարերն այստեղ մշտապես խոսել եւ խոսելու են հայերեն:
Տաթևի վանական համալիրն ու համալսարանը մեր գիտության ու մշակույթի ամենաակնառու պատմական կենտրոններից են: Տաթևն արժանիորեն մեծ համբավ էր վաստակել` շնորհիվ այստեղ իր բեղմնավոր գործունեությունը ծավալած Գրիգոր Տաթևացի վարդապետի, ով աշակերտն էր Հովհան Որոտնեցու: Խորհրդանշական է, որ հայ և համաշխարհային աստվածաբանության մեծագույն դեմքերից մեկի` Գրիգոր Տաթևացու` սրբերի դասին միանալու 600-ամյակի տոնակատարությունները և "Տաթևի վերածնունդը" ժամանակագրորեն համընկնում են: Հայ գրչի հնագույն այս օրրանին ու նրա շրջակա տարածքներին նոր շունչ հաղորդելը նաև շատ լավ նվեր է Հայոց գրատպության 500-ամյակի առթիվ, որը մենք շուտով նշելու ենք:
Հարգելի՛ ներկաներ,
Ես շնորհավորում եմ բոլորիս: Ինչպես ասում են. "Լավ սկիզբը գործի կեսն է": "Տաթևի վերածնունդը" Հայաստանի ազգային մրցունակության հիմնադրամի նախաձեռնությունն է, որը ջերմ աջակցություն է գտել մեր կառավարության, Հայ Առաքելական Սուրբ Եկեղեցու և բարերարների կողմից: Ես շնորհակալություն եմ հայտնում պարոն Ռուբեն Վարդանյանին, ով դարձավ նախագծի իսկական առաջնորդն ու շարժիչ ուժը:
Շնորհակալություն եմ հայտնում նաև այս գործակցության մեջ ընդգրկված բոլոր անհատներին ու կազմակերպություններին` անհավանական թվացող նախաձեռնության, հավատի, դժվարություններից չվախենալու, ձեռք ձեռքի աշխատելու և առկա արդյունքների համար: Կարծում եմ` յուրաքանչյուր այցելու երախտագիտությամբ է հիշելու նաև շինարարներին, ովքեր իսկապես հսկայական գործ են կատարել:
Միջազգային ասպարեզում մրցունակ լինելու համար մենք երբեմն հեռավոր երկրներ գնալու և սովորելու կարիքն ենք ունենում, և դա օրինաչափ է: Բայց կան դասեր, որոնք մենք պետք է քաղենք այստեղ: Տաթևի համալիրը կառուցողները իրենց ժամանակի ամենամրցունակ ճարտարապետներից էին: Տաթևի համալսարանն իր ժամանակի ամենամրցունակ կրթօջախներից էր, իսկ Սուրբ Գրիգոր Տաթևացին մինչ օրս էլ աշխարհի ամենամրցունակ մտածողներից է:
Վերածնված Տաթև նշանակում է վերածնված Սյունիք, ուրեմն նաև` մրցունակ Հայաստան:
Շնորհավորում եմ բոլորիս և շնորհակալություն”:
Գորիսում Հանրապետության ղեկավարը ներկա է գտնվել նաեւ քաղաքի օրվա կապակցությամբ կազմակերպված ժողովրդական տոնակատարությանը: Տոնական միջոցառումների շրջանակում, Գորիսում բացվել է Գրիգոր Տաթեւացու արձանը:
Այսօր Նախագահ Սերժ Սարգսյանը հանդիպել է նաեւ հարյուրից ավելի սփյուռքահայ լրագրողների եւ խմբագիրների հետ, ովքեր Երկրի ղեկավարի հետ հանդիպման նպատակով Գորիս են ժամանել ԼՂՀ մայրաքաղաք Ստեփանակերտից, որտեղ մասնակցել են Լրագրողների համահայկական 5-րդ համաժողովին:
Գորիսից Նախագահը մեկնել է Հալիձոր: Այս բնակավայրից մեկնարկել է “Տաթեւի վերածնունդ” ծրագիրը: Ծրագրի շրջանակներում տեղի է ունեցել Հալիձոր եւ Տաթեւ գյուղերը միացնող աշխարհի ամենաերկար ճոպանուղու տեխնիկական գործարկման արարողությունը: Որոտանի գեղատեսիլ կիրճի վրայով ձգվող 5.7 կմ երկարությամբ ճոպանուղին նոր հնարավորություններ է բացում վանական համալիրը այցելուների համար հեշտ հասանելի դարձնելու տեսանկյունից:
Ծրագիրը նպատակաուղղված է Տաթեւի մերձակա շրջանների զարգացմանը, Հայաստանի այդ հնագույն եւ հեղինակավոր վանական համալիրի հոգեւոր, գիտական եւ մշակութային ավանդույթների երբեմնի համբավի ու փառքի վերականգնմանը:
Ճոպանուղու գործարկման արարողությանը Հանրապետության ղեկավարի հետ ներկա են եղել Ն.Ս.Օ.Տ.Տ. Գարեգին Բ Ամենայն Հայոց Կաթողիկոսը, ԼՂՀ Նախագահը, հասարակական, քաղաքական, մշակութային շրջանակների ներկայացուցիչներ, պաշտոնյաներ, հարյուրավոր հյուրեր աշխարհի տարբեր երկրներից, որոնցից շատերը ծրագրի բարերաներն են: Ճոպանուղու բացման կապակցությամբ` Նախագահ Սերժ Սարգսյանը Տաթեւում ողջույնի խոսք է հղել, որում, մասնավորապես, ասված է.
“Վեհափա՛ռ Տեր,
Հարգարժա՛ն հյուրեր,
Սիրելի՛ հայրենակիցներ,
Ողջունում եմ բոլորիդ Հայաստանի ամենագեղեցիկ վայրերից մեկում: “Տաթևի վերածնունդ” ծրագրի մեկնարկը հաճելի առիթ է կրկին այցելելու և վայելելու Սյունյաց աշխարհի անկրկնելի բնապատկերներն ու միջնադարյան հայ ճարտարապետության գլուխգործոցները: Այսօր այս բնապատկերը հարստանում է ժամանակակից ճոպանուղով, որը կոչված է նոր հմայք հաղորդելու Որոտանի կիրճին և նոր ու անջնջելի տպավորություններ պարգևելու այցելուներին:
Աշխարհի ամենաերկար ճոպանուղու կառուցմամբ մենք նպատակ չունենք որևէ մեկին զարմացնել: Մեր հետապնդած նպատակներն իհարկե համեստ են աշխարհի չափանիշներով, բայց ունեն բացառիկ կարևորություն Տաթևի ու նրա հարակից տարածքների համար: “Տաթևի վերածնունդ” ծրագիրը Հայաստանի հարավի համակողմանի զարգացման ռազմավարության նշանակալի բաղադրիչ է, ինչպես նաև լուրջ ազդակ այս շրջանի տնտեսական, գիտական ու մշակութային կյանքի աշխուժացման համար:
Սա պետական և մասնավոր հատվածների համագործակցությամբ խոշորագույն նախաձեռնություններից է, որ այսօր իրականացվում է Հայաստանում: Սյունյաց անկրկնելի բնության այս չքնաղ ձորը նախ կտրել-անցել է մարդկային միտքը: Հետո հսկայական թռիչքի այդ միտքը ոգևորել է բազում մարդկանց: Այսօր էլ թռիչքի հերթն արդեն կառուցված ճոպանուղունն է, որը միացրեց պատմությունն ու ապագան, ավանդականն ու ժամանակակիցը, մշակույթն ու բիզնեսը: Գործող ճոպանուղին կենդանի վկայությունն է այն բանի, որ նույնիսկ ամենաանհավանական թվացող երազները հաստատապես կարելի է իրականություն դարձնել, և բոլոր դժվարություններն աներկբա տեղի են տալիս, երբ կա հստակ նպատակադրում, կա վարակիչ ոգևորություն, կա հավատ, որ ճիշտ ու կարևոր բան ես անում:
Տիկնա՛յք և պարոնա՛յք,
Այսօր նշանավոր ու տոնական առիթով մենք գտնվում ենք հայ ժողովրդի բնօրրաններից, հազարամյակների հայոց մշակույթի և գիտական մտքի հնագույն օջախներից մեկում` Սյունիքում: Այստեղ անցյալն ամփոփվում է ապագայի լույսով: Այստեղ վերքերը լռել, իսկ քարերը խոսել գիտեն: Շատերն են երազել ու շարունակում են երազել այս հողում սեփական բիրտ հետքը թողնել, որ սովորաբար ավերածությունների հետքն է: Բայց այստեղ մշտապես իշխել ու իշխելու են հայոց կոթողները, իսկ քարերն այստեղ մշտապես խոսել եւ խոսելու են հայերեն:
Տաթևի վանական համալիրն ու համալսարանը մեր գիտության ու մշակույթի ամենաակնառու պատմական կենտրոններից են: Տաթևն արժանիորեն մեծ համբավ էր վաստակել` շնորհիվ այստեղ իր բեղմնավոր գործունեությունը ծավալած Գրիգոր Տաթևացի վարդապետի, ով աշակերտն էր Հովհան Որոտնեցու: Խորհրդանշական է, որ հայ և համաշխարհային աստվածաբանության մեծագույն դեմքերից մեկի` Գրիգոր Տաթևացու` սրբերի դասին միանալու 600-ամյակի տոնակատարությունները և "Տաթևի վերածնունդը" ժամանակագրորեն համընկնում են: Հայ գրչի հնագույն այս օրրանին ու նրա շրջակա տարածքներին նոր շունչ հաղորդելը նաև շատ լավ նվեր է Հայոց գրատպության 500-ամյակի առթիվ, որը մենք շուտով նշելու ենք:
Հարգելի՛ ներկաներ,
Ես շնորհավորում եմ բոլորիս: Ինչպես ասում են. "Լավ սկիզբը գործի կեսն է": "Տաթևի վերածնունդը" Հայաստանի ազգային մրցունակության հիմնադրամի նախաձեռնությունն է, որը ջերմ աջակցություն է գտել մեր կառավարության, Հայ Առաքելական Սուրբ Եկեղեցու և բարերարների կողմից: Ես շնորհակալություն եմ հայտնում պարոն Ռուբեն Վարդանյանին, ով դարձավ նախագծի իսկական առաջնորդն ու շարժիչ ուժը:
Շնորհակալություն եմ հայտնում նաև այս գործակցության մեջ ընդգրկված բոլոր անհատներին ու կազմակերպություններին` անհավանական թվացող նախաձեռնության, հավատի, դժվարություններից չվախենալու, ձեռք ձեռքի աշխատելու և առկա արդյունքների համար: Կարծում եմ` յուրաքանչյուր այցելու երախտագիտությամբ է հիշելու նաև շինարարներին, ովքեր իսկապես հսկայական գործ են կատարել:
Միջազգային ասպարեզում մրցունակ լինելու համար մենք երբեմն հեռավոր երկրներ գնալու և սովորելու կարիքն ենք ունենում, և դա օրինաչափ է: Բայց կան դասեր, որոնք մենք պետք է քաղենք այստեղ: Տաթևի համալիրը կառուցողները իրենց ժամանակի ամենամրցունակ ճարտարապետներից էին: Տաթևի համալսարանն իր ժամանակի ամենամրցունակ կրթօջախներից էր, իսկ Սուրբ Գրիգոր Տաթևացին մինչ օրս էլ աշխարհի ամենամրցունակ մտածողներից է:
Վերածնված Տաթև նշանակում է վերածնված Սյունիք, ուրեմն նաև` մրցունակ Հայաստան:
Շնորհավորում եմ բոլորիս և շնորհակալություն”: